आयो ‘धनपति’को फस्ट लुक पोष्टर, फिल्म असारमा
‘धनपति’को फस्ट लुक पोष्टर आइतबार सार्वजनिक भएको छ। पशुपतिप्रसादको सफलतापछि टुकी आर्ट्स प्रालिले दीपेन्द्र के. खनाल प्रोडक्सनसँगको सहकार्यमा सो चलचित्र निमार्ण गरेको हो। खगेन्द्र लामिछानेको लेखन तथा रहेको धनपतिलाई दीपेन्द्र के खनालले निर्देशन गरेका हुन्। खगेन्द्र लामिछाने, सुरक्षा पन्त, आशान्त शर्मा, मनिष निरौला, सुरभी बर्तौला, हरिहर शर्मा, रवी गिरी, कमल देवकोटा, प्रकाश घिमिरे लगायतका कलाकारको अभिनय चलचित्रमा देख्न सकिनेछ। सहायक निर्माता ओम गुरुङ, सह–निर्माता रजना नापित, समीर देवकोटा रहेका छन्। निर्माता भने रोजिना सिटौला हुन्।
‘पशुपतिप्रसाद हेरिसक्नु भएका दर्शकले मबाट अलि बढी अपेक्षा राख्नुलाई मैले स्वभाविक रुपमा लिन्छु, मलाई विश्वास छ दर्शकको त्यो अपेक्षालाई धनपतिले पुरा गर्नेछ।’ खगेन्द्र लामिछानेले भने। आम मान्छेको जीवनलाई पात्र बनाएर पर्दामा उतार्ने खगेन्द्रले यसमा पनि उस्तै विषयलाई निरन्तरता दिएका छन्।
राजनीतिक विरासत बोकेको सानाकाजी उर्फ धनपती द्वन्द्वको चपेटामा परेर पूर्वी तराईबाट राजधानी आएर बसेको हुन्छ। गर्जो टार्नका लागि सानो रेष्टुरेन्टमा काम गर्ने अलावा ऊसँग अन्य आयस्रोत हुदैँन, इमान बेच्न नचाहने स्वाभिमानी ऊ छोरीलाई बोर्डिङ स्कुलमा पढाउन चाहन्छ। यस्तै कथामा आधारित धनपति चलचित्र रहेको छ। निर्देशक खनालले आफूले जीवनमा सबैभन्दा बढी दुःख गरेर बनाएको चलचित्र नै धनपति रहेको बताए।
चलचित्र आगामी असार २३ गते सार्वनिक हुनेछ।
