सर्वोच्च बारका प्रतिनिधिहरुद्वारा संवैधानिक इजलास पुनर्गठनको माग
कलाखबर,१८,जेष्ठ–काठमाण्डौं । सर्वोच्च बारका प्रतिनिधिहरुले आज प्रधानन्यायाधीश चोलेन्द्र शमसेर जबरासँग भेटवार्ता गर्ने भएका छन् । उनीहरुले आजको भेटमा संवैधानिक इजलास पूनर्गठनको विषयमा प्रधानन्याशीश जबरालाई ध्यान आकर्षण गराउने भएका छन् । सर्वोच्च अदालत बार एशोसिएसनका अध्यक्ष पूर्णमान शाक्यले मंगलबार बिहान ११ बजे प्रधानन्यायाधीश जबरासँग भेट्ने समय तय भएको जानकारी दिए ।
यसअघि नेपाल बार एशोसिएसन र सर्वोच्च बारका प्रतिनिधिहरुले संयुक्त रुपमा प्रधानन्यायाधीशलाई भेट्ने तयारी गरेका थिए । तर नेपाल बार एशोसिएसनका पदाधिकारीमध्ये दुई जना कोरोनाबाट संक्रमित भएकाले भेट्न नसक्ने भएकाले सर्वोच्च बारका प्रतिनिधिले मात्र भेट्न लागेको शाक्यले बताए ।
संसद विघटनविरुद्धका मुद्दा हेर्न प्रधानन्यायाधीश जबराले आफ्नो नेतृत्वमा पाँच सदस्यीय संवैधानिक इजलास गठन गरेका छन् । तर न्यायाधीशहरुको वरिष्ठताको क्रम मिचेर इजलास गठन गरिएपछि त्यसको पुनर्गठनको माग उठेको छ ।
इजलासमा एमाले र माओवादीको एकता रद्द गर्न आदेश दिएका बमकुमार श्रेष्ठ र सो आदेश पुनरावलोकन नहुने फैसला गरेका तेजबहादुर केसीलाई पनि राखिएपछि कानुन व्यवसायीहरुले विरोध गरेका छन् ।
रिटमा बहस गर्ने क्रममा कानुन व्यवसायीहरुले श्रेष्ठ र केसीलाई इजलासबाट हटाउन माग गरे पनि प्रधानन्यायाधीश जबराले त्यसलाई अस्वीकार गर्दै आएका छन् ।
