बिश्वमै सबै भन्दा धेरै कोरोनाले खतरायुक्त बन्यो भारत,दैनिक ९० हजारको हाराहारीमा संक्रमित थपिदै
कलाखबर संवाददाता,२२ भदौ–काठमाण्डौं । अहिले भारतमा कोरोना संक्रमणको सबै भन्दा बढी खतरा बढेको छ । दैनिक रुपमा प्राय ९० हजारको हाराहारीमा संक्रमित थपिदै गएपछि बिश्वमा नै अहिले भारत दोस्रो स्थानमा परेको छ । छिमेकी देश भारतमा कोरोना भाइरसबाट संक्रमित हुनेको संख्या दक्षिण अमेरिकी देश ब्राजिलमा भन्दा पनि धेरै भएको छ । सबैभन्दा बढी प्रभावित भएको अमेरिकापछि भारतमा संक्रमितको संख्या धेरै पुगेको हो।
जोन्स हप्किन्स विश्वविद्यालयलको कोरोना भाइरस स्रोत केन्द्रका अनुसार भारतमा कुल संक्रमितको संख्या ४२ लाख चार हजार भन्दा बढी पुगेको छ । ब्राजिलमा संक्रमितको संख्या ४१ लाख ३७ हजार भन्दा धेरै रहेको छ । भारतमा हालसम्म कोभिड–१९ बाट ७१ हजार ६ सय भन्दा बढीको ज्यान गएको छ । भारतमा लकडाउन खुलाएर जनजीवन सामान्य बनाउने क्रम जारी रहँदा संक्रमण अति तीव्र गतिमा बढिरहेको हो ।
ज्यान गुमाउनेको संख्यामा ब्राजिल दोस्रो नम्बरमा छ, त्यहाँ एक लाख २६ हजार ६ सय भन्दा बढीको ज्यान गइसकेको छ । सबैभन्दा बढी प्रभावित भएको अमेरिकामा ६२ ला ७६ भन्दा बढी संक्रमित भएकोमा एक लाख ८९ हजारको मृत्यु भएको छ । विश्वभर अहिलेसम्म दुई करोड ७१ लाख तीन हजार भन्दा बढी संक्रमित भएका छन् र ८ लाख ८३ हजार भन्दा बढीको ज्यान गएको छ ।
