नेपाल चलचित्र विकास बोर्डका अध्यक्ष केशव भट्टराईको निधन पछि आज दाहसंस्कार गरिदै

कलाखबर संवाददाता,३०,मंसिर– काठमाण्डौं । आईतबार नेपाल चलचित्र विकास बोर्डका अध्यक्ष केशव भट्टराईको आईतबार निधन भएको छ । मध्यरातमा भट्टराईको निधन भएको खबर प्राप्त भए पनि मृत्यु हुनुको कारण जानकारीमा आएको छैन ।
केही दिन अघिदेखि ओम हस्पिटलमा उपचार भई रहेको भट्टराईको आईताबार राती अचनाक निधन भएको हो । यद्यपी हृदयघातका कारण निधन भएको ओम अस्पताल स्रोतले जनाएको छ ।
२०७५ चैत ४ गते बसेको मन्त्रिपरिषद् बैठकले भट्टराईलाई वोर्डको अध्यक्षमा नियुक्त गर्ने निर्णय गरेको थियो । अध्यक्ष हुनुअघि भट्टराई लामो समयदेखि चलचित्र निर्माण तथा अभिनयमा व्यस्त थिए । आफ्नो मान्छे, छोडी गए पाप लाग्ला, देवर बाबु लगायतका हिट चलचित्र भट्टराईले निर्माण गरेका हुन् ।
पछिल्लो पटक २१ चैतमा उनले निर्माण गरेको नयाँ चलचित्र ’यात्रा’ प्रदर्शन भएको थियो । यसअघिकी अध्यक्ष निकिता पौडेलले २२ माघमा पदबाट राजीनामा दिएकी थिइन् ।
एक दिनअघि मात्रै अर्का कलाकार दिपक क्षेत्रीको निधन भएको थियो । अहिले भट्टराईको शवलाई चलचित्र विकास बोर्डमा राखिएको छ । कलाकार तथा चलचित्रकर्मी भट्टराईको शवलाई आजै आर्यघाटमा दाहसंस्कार गरिने परिवारिक स्रोतले जनाएको छ ।