सगरमाथाको उचाई मापन कार्य तीव्र,करिब ६० प्रतिशत काम सकियो

कलाखबर संवाददाता,२९,चैत्र–सोलुखुम्बु । विश्वको सर्वोच्च शिखर सगरमाथाको उचाइ मापन कार्य ६० प्रतिशत सकिएको नापी विभागले जनाएको छ ।

सिरहाको माडरदेखि सोलुखुम्बुको पत्ताले, फाप्लु नजिकैको छुल्याङ्मु डाँडा र पिके डाँडासम्मको उचाइ लिएर सम्पर्क स्थापित गर्ने काम भैसकेको र यो काम सकिएसँगै ६० प्रतिशत काम सम्पन्न भएको सगरमाथा मापन योजनाका संयोजक तथा प्रमुख नापी अधिकृत सुशील डंगोलले बताउनुभयो ।

अब प्राविधिक टोलीले सगरमाथा उचाइमा पुगेर उचाइ मापन गर्नेछन् । सगरमाथाको आधिकारिक उचाइ आठ हजार आठ सय ४८ मिटर मानिए पनि नेपालले भने पहिलो पल्ट मापन गर्न लागेको हो ।

२०७२ सालको बिनाशकारी भुकम्पको कम्पनले सगरमाथाको उचाईमा केही गडुबढ हुन सक्ने विज्ञहरुको अनुमान रहेको छ । यसअघि भारत, चीन, अमेरिकालगायत देशले सगरमाथाको उचाइ मापन गर्दै आएका थिए ।