प्रधानमन्त्री शेरबहादुर देउवाद्वारा संविधान अनुसार नै १६५ निर्वाचन क्षेत्र कायम गरिने स्पष्ट
प्रधानमन्त्री शेरबहादुर देउवाले संविधानअनुसार नै १६५ निर्वाचन क्षेत्र कायम गरिने स्पष्ट पारेका छन्।
नेपाल इन्जिनियर्स एसोसिएसनको पच्पन्नौँ वार्षिकोत्सवको आज यहाँ उद्घाटन गर्दै उनले २४० निर्वाचन क्षेत्र हुने हल्लाको भ्रममा
नपर्न समेत सबैमा आग्रह गरे।
प्रधानमन्त्री देउवाले आगामी मङ्सिर भित्रै तीन वटै तहको निर्वाचन सम्पन्न गरिने गृहकार्यमा सरकार जुटेको बताउँदै “माघ ७ भित्र
सबै निर्वाचन गरिसक्नुपर्ने संवैधानिक बाध्यता छ, निर्वाचन क्षेत्र निर्धारण आयोगको एक-दुई दिनभित्रै निक्र्यौल हुनेछ, संविधानको
सर्वस्वीकार्यता बढाई देशलाई समृद्धितर्फ अघि बढाउन सबैको ध्यान जानुपर्छ,” भने।
देशको विकास निर्माणमा इञ्जिनियरको महत्वपूर्ण भूमिका रहेको छ, उनले भने– “देशको विकास निर्माणमा इञ्जिनियरको
महत्वपूर्ण भूमिका छ, स्थानीय निकायमा इञ्जिनियर लगायत सबै कर्मचारीको मनोबल उच्च बनाउन सुविधा र जिम्मेवारीको
सुनिश्चितता गरिने विश्वास दिलाउन चाहन्छु ।”
प्रधानमन्त्री देउवाले अझै पनि भूकम्पपीडित पालमुनि बस्न बाध्य रहेको उल्लेख गर्दै उनीहरुको उचित व्यवस्थापनका लागि
इञ्जिनियरलगायत सबैको सक्रियता आवश्यक रहेको बताए।
इञ्जिनियरको क्षमता अभिवृद्धिका लागि एसोसिएसनले स्टाफ कलेज निर्माणको माग गरेकोमा त्यसका लागि आफू सकारात्मक
रहेको उनले बताए।
पूर्वमन्त्रीद्वय लक्ष्मण घिमिरे र गणेश साहले विज्ञान र प्रविधिको विकास गर्न कम्तीमा देशको एक प्रतिशत बजेट लगानी गरी
इञ्जिनियरिङ पेशालाई व्यावसायिक र मर्यादित बनाउनुपर्नेमा जोड दिए।
एसोसिएसनका अध्यक्ष हरेराम श्रेष्ठले स्थानीय निकायमा इञ्जिनियरलाई खटाउँदा उच्च मनोबलका साथ काम गर्ने वातावरण
सिर्जना गर्न सरकारको ध्यानाकर्षण गराउँदै इञ्जिनियरहरु पनि पेशाप्रति मर्यादित र जिम्मेवार ढङ्गले देश निर्माणमा जुट्नुपर्ने
बताए।
सो अवसरमा एसोसिएसनले संस्थागततर्फ नेपाल विद्युत् प्राधिकरणलाई उत्कृष्ट सम्मान तथा प्राधिकरणकै प्रमुख कार्यकारी
अधिकृत कुलमान घिसिङलाई उत्कृष्ट अर्वार्ड प्रदान गरिएको छ।
यसैगरी ईश्वरीमान प्रधानलाई लाइफटाइम एचिभमेन्ट अवार्डबाट सम्मानित गरिएको छ भने उत्कृष्ट काम गर्ने इञ्जिनियर दामोदर
आचार्य, डा सुधा श्रेष्ठ र देवेन्द्रकुमार झालाई सम्मान गरियो ।
श्रोत : रासस
