साम्राज्ञलक्ष्मीको उदयले रेखालाई चुनौती
काठमाडौं । एक वर्षपछि शुक्रबारदेखि रेखा थापा अभिनित ‘पलाँस’ सिनेमाघरमा लागेको छ । ‘पलाँस’ ले सोलो रिलिज हुने मौका पाएको छ । गत साता ‘निर्भय’ र ‘लप्पन छप्पन’ आपसमा जुधेका थिए । सोलो चलचित्र रिलिज हुन पाउनु रेखाका लागि भाग्यकै कुरा हो ।
‘पलाँस’ आफ्ना लागि महत्वपूर्ण भएको रेखाको भनाइ छ । बिहीबार भएको ‘पलाँस’ को प्रिमियरमा सुखद प्रतिक्रियासँगै चलचित्रले सफलता पाउने निर्माण पक्षको दाबी छ । ‘पलाँस’ मा चेलीबेटी बेचबिखनको विषयलाई उठाइएको छ । ‘पलाँस’ को निर्माण कृषा चौलागाईले गरेकी हुन् । उनी लामो समयपछि चलचित्र निर्माणमा फर्किएकी छन् । ‘पलाँस’ मा रेखा थापासँगै कामेश्वर चौरासिया, अयुव केसीलगायतको अभिनय रहेको छ । चलचित्रको निर्देशन सुवास कोइरालाले गरेका हुन् ।
अभिनेत्री रेखा थापालाई सिंगल स्क्रिन थियटरको सुपरस्टार मान्ने धेरै छन् । सिंगल स्क्रिन थियटरमा रेखाले खेलेका चलचित्रले दुई–तीन दिन इनिसियल व्यापार गर्दै आएका छन् । तर, उनी अभिनित चलचित्र मल्टिप्लेक्सका हलमा हत्तपत्ति लाग्दैनन् । एक वर्षअघि रेखा अभिनित ‘रामप्यारी’ प्रदर्शनमा आएको थियो । एक–दुई दिन सो चलचित्रले इनिसियल व्यापार गरेको पनि हो । तर, त्यसपछि ‘रामप्यारी’ को प्रदर्शन सोचेअनुरूप भएन । त्यही बेलादेखि रेखा निराश बन्न थालेकी हुन् । ‘रामप्यारी’ नचलेपछि उनले आफ्नो ब्यानरमा ‘कसले चो¥यो मेरो मन फेरि’ नामक शीर्षकमा चलचित्र बनाउने घोषणा गरिन् । तर, त्यसलाई त्यत्तिकै थन्काएर उनी अरुकै ब्यानरमा निर्मित चलचित्र खेल्न थालिन् ।
पछिल्लो समय प्रियंका कार्की, सृष्टि श्रेष्ठ, साम्राज्ञराज्यलक्ष्मी शाहलगायतको उदयले रेखा थापाको स्टारडममा चुनौती दिइरहेको छ । प्रियंका कार्की अभिनित एकपछि अर्को चलचित्रले करोडौंको व्यापार गरिरहेको छ । त्यस्तै, साम्राज्ञलक्ष्मी, सृष्टि, केकी अधिकारीहरूले राम्रै चर्चा बटुलेका छन् ।
पछिल्लो समय साम्राज्ञलक्ष्मी युवापुस्तामा निकै लोकप्रिय छिन् । जुन कुराको पुष्टि उनी अभिनित ‘ए मेरो हजुर २’ को एउटा गीतले युट्युबमा पाएको लोकप्रियताले पुष्टि गर्छ । जुन गीतलाई २४ घन्टा नपुग्दै पाँच लाख पटक हेरिएको थियो । पर्सा जिल्ला स्थायी घर भएकी साम्राज्ञी अभिनित सो चलचित्रको गीत अहिलेसम्म करिब १४ लाख पटकसम्म हेरिएको छ । अनमोल केसीको ‘ड्रिम्स’ पछि साम्राज्ञलक्ष्मीको यो दोस्रो चलचित्र हो । ‘ए मेरो हजुर २’ चलचित्रलाई झरना थापाले निर्देशन गरेकी छन् । चलचित्र अर्को वर्ष रिलिज हुने बताइएको छ ।
